Noreg skal saman med Brasil leie arbeidet med det nye internasjonale fondet for regnskog. Det blei annonsert i Washington D.C. torsdag.
– Å ta vare på regnskogen er det mest effektive klima- og naturtiltaket Noreg kan gjere internasjonalt. Noreg har unik erfaring med å jobbe med regnskog, og eg er glad for at vi, saman med Brasil, skal leie arbeidet med det nye fondet, seier klima- og miljøminister Andreas Bjelland Eriksen.
Fondet har namnet Tropical Forest Forever Facility (TFFF), og blir omtalt som den største internasjonale regnskogsatsinga sidan Noreg starta si eiga regnskogssatsing for 18 år sidan.
Målet er å sikre langsiktig finansiering som kan bidra til å bevare tropisk skog i generasjonar framover. TFFF blei lansert i samband med klimatoppmøtet COP30 i Brasil i november 2025.
Statsminister Jonas Gahr Støre har varsla eit norsk lånebidrag på inntil 30 milliardar kroner, avhengig av bestemte vilkår, mellom anna at fondet får tilstrekkeleg finansiering frå fleire land.
No får Noreg ei tydeleg leiarrolle i det som enkelte har kalla regnskogens oljefond. Utviklingsminister Åsmund Aukrust presenterte dette på eit ministermøte om TFFF i samband med Verdsbankens vårmøte i Washington D.C. torsdag.
Noreg og Brasil skal dele rolla som styreleiarar. Brasil er initiativtakar til TFFF.
– Det er ein styrke at land frå ulike verdsdelar leiar fondet saman, slik Brasil og Noreg skal gjere. Å ta vare på tropisk skog er dobbelt viktig, både som klimatiltak og for å ta vare på eit uerstatteleg biologisk mangfald. Det er viktig for oss at dette arbeidet lukkast i det som elles er krevjande tider for internasjonalt samarbeid, seier utviklingsminister Åsmund Aukrust.
Klima- og miljøminister Andreas Bjelland Eriksen skal òg følgje opp arbeidet vidare under eit klimaministermøte i Tyskland 21.–22. april, den såkalla Petersbergdialogen.
Det som skil TFFF frå mange andre ordningar, er at landa bak initiativet ønskjer å mobilisere private investeringar gjennom eit fond som skal gi avkastning, etter ein modell som delvis liknar måten Statens pensjonsfond utland er bygd opp på.
Ein del av avkastninga skal gå til land som dokumenterer at dei tek vare på regnskogen sin. Fordi utbetalingane er knytte til avkastning frå eit langsiktig fond, er ambisjonen at ordninga over tid skal bli mindre avhengig av tradisjonelle bistandsmidlar.
På COP30 blei bidrag på meir enn 65 milliardar kroner varsla frå Brasil, Indonesia, Tyskland, Frankrike og Noreg. Målet er å nå 100 milliardar kroner innan utgangen av 2026.
På lengre sikt er målet at fondet skal byggjast opp til ein kapital på 1 250 milliardar kroner. Det vil ta fleire år før fondet kjem i ein fase der det kan gi stabil avkastning.
Noreg si oppgåve som delt styreleiar blir i første omgang å vere med på å etablere fondet og bidra til å mobilisere meir kapital saman med Brasil.
