Har du ein journalist i tankane som skriv sterke saker på klingande nynorsk? No kan du foreslå kandidatar til Kultur- og likestillingsdepartementet sin nynorskpris for journalistar. Fristen for å sende inn forslag er 1. april.
Nynorskprisen for journalistar er ei prestisjetung utmerking som blir gitt til ein journalist som har utmerkt seg med levande og godt nynorsk i norske medium. Prisen skal òg bidra til å gi nynorsk meir status og større plass, også på nye område i medielandskapet.
Vinnaren får 75 000 kroner og eit kunstverk. Prisen blir delt ut kvart år.
Forslag til kandidatar skal sendast inn via nettsidene til NRK. I innsendinga blir det lagt vekt på at du skriv ei grundig grunngjeving for kvifor kandidaten bør vinne, og kva vedkomande har gjort som løftar nynorsk i journalistikken. Kandidatar kan jobbe i ulike medium, som avis, radio og TV.
NRK Nynorsk mediesenter fungerer som uavhengig sekretariat for prisen. Juryen er uavhengig og oppnemnd av Kultur- og likestillingsdepartementet.
Årets jury består av Jens Kihl, journalist og frontsjef i Bergens Tidende, Unn Røyneland, professor i nordisk språkvitskap og fleirspråklegheit ved Universitetet i Oslo, og Arill Riise, pensjonert journalist og tidlegare programleiar i TV 2.
